Kultur ekintzen kronikak: “Zizelkariak Hondarribian”

Blaganek hilero antolatzen dituen kultur jarduerak bertan behera utzi behar izan ditugu, baina tarte honetan,  jadanik pasatu diren ekintzen inguruko hausnarketak ekarriko ditugu gogora. Hemen urtarrilean izandako  “Zizelkariak” jardueraren inguruko kronika, disfrutatu.

—————————–

Zizelkariak Hondarribian (*)

zizelkariak

Sustrai Colinak 2017ko Bertsolari Txapelketa Nagusiaren bukaerako agurra honela amaitu zuen:

Euskal Herria gelditu
ez dadin euskal erdian
bila ditzagun arnas ta
ardatzak periferian.

Aldiriko arnas bizigarri horren lagin polita eskaini digu Topatu.eus gazte proiektu komunikatiboak Zizelkariak izeneko dokumentalarekin. Euskal Herriko periferia erdigunera ekartzea helburua duen filmak gure geografiaren ertzetan hainbat mugimenduetan lanean ari diren sei gazteri ahotsa ematen die.

Urtarrilean Zizelkariak dokumentala ikusteko aukera izan genuen Hondarribiko Gatzetxean. Blaganek antolatutako urteko Kultur Programazioaren barruan, Ainara Conde eta Maddi Ane Txoperena lesakarrek azaldu ziguten ikusentzunezko horren ekoizpen prozesua.

Dokumentalak adierazten digu lur egurtua dela gurea eta sei gazte euskaldun hauek, ertzetako lur egurtuan jaio eta hazitakoak, arrotz sentitu izan direla kontatzen digute. Tuterako mugimendu feministako kidea den Edurne Sanchezek euskaraz hitz egiteaz lotsatzen zela aipatzen du. Euskaraz hitz egiteagatik oso markatua sentitu izan dela eta euskaldun gisa jasaten zuen zapalkuntza horretatik bizitu zuen feminismoaren beharra. Martta Irigoien gazteak dantza eta antzezpenarekin gorpuzten du euskara Amikuzen. Gazteek modu kolektiboan euskara Baxenafarroako paisaian gorpuzten dute Libertimenduaren bidez eta Irigoienen ustez, oso garrantzitsua da gorputza plazara eramatea euskaraz sortu den zerbaiten bidez. Irunberriko gazte musikaria den Ibai Osinagak ere euskaraz abestea hautu politiko gisa hartzen du.

Antzera mintzo dira Maika Alfaro, Jon Maruri eta Arkaitz López: despopulatzeaz, prekarietateaz, etxe hutsen arazoaz, langabeziaz, turismoaren arriskuez… Alduden, Ezkerraldean, Arabar Errioxan, Amikuzen, Irunberrin edo Erriberan bizi duten errealitate soziopolitikoa aldatu nahi duten euskal hiztun gazteak dira. Sei ertz, sei ahots, sei borroka. Lur egurtuan jaio eta zizelkari bihurtu diren sei gazte.

Lur eta hizkuntza egurtua da gurea, eta  Hondarribiko Gaztetxera bertaratu ginenon artean solasaldia interesgarria sortu zen. Filmean agertzen diren Tutera, Amikuze edo Ezkerraldeko gazteak “euskararen periferia geografikoan” erraz kokatzen ditugu. Baita Maule, Gasteiz edo Balmasedakoak ere. Azpeitia, Tolosa edo Oiartzun, ordea, erdigunean kokatuko genituzke. Baina, non ipiniko genuke Hondarribia? Euskararen erdigunea al da txol herri eder garbi hau? Non kokatuko zenuke Hondarribian euskaraz aritu nahi dutenak? Gizartearen erdigunean ala periferian? Zer gara euskal hiztunak Hondarribian erdigune ala ertz?

Ez dut uste garrantzi handiegirik duenik galdera horien erantzun zehatza zein den jakitea. Susmoa dut euskaraz aritu nahi dugun guztiok nahiko periferikoak garela, horregatik erdigunea eta ertza non kokatzen dugun baino, euskaraz lasai, lotsarik gabe eta lotsagabe egiten duten hiztunak behar ditugu: Alduden, Orion, Irunberrin eta Markinan. Hondarribian ere denon ekarpena ezinbestekoa da: kaletar, zahar, etorriberri, haur, gazte, kanpotar, baserritar, bañista ala gazte.

Zizelkariak dokumentalean euskaraz hitz egiten duten gazteak agertzen dira; Tutera, Arberatz, Mamariaga, Aldude, Irunberri eta Moretan euskaraz mintzo direnak. Askotan, kexu aritzen gara gazteen hizkuntza (eta bestelako) praktiken inguruan. Belaunaldien arteko kritikak ohikoak izaten dira, baina, ertz izendatzen ditugun herri horietan bezala, Hondarribian ere baditugu zizelkariak diren gazteak: Psilocyben musika sortzen, Billabak abesbatzan kantuan, mugimendu feministan berdintasunaren alde lanean, Gaztetxean ekimen ezberdinak antolatzen,  eta beste hainbat eta hainbat ekimen sustatzen, herrian eta herritik kanpo.

Geroa zizel, giroa pizten abesten du Olatz Salvadorrek Zizelkariak dokumentalerako egindako abestian. Hondarribian ere jarrai dezagun euskarazko giroa pizten, oraingo eta geroko zizelkari euskaldunak erdigune izan daitezen.

Post Scriptum: Zoritxarrez, Blaganek ezin izango ditu gazteekin batera jarduera gehiago antolatu Hondarribiko Gaztetxean. Martxoaren 5ean gaztetxea itxi baizuten, zizela ordez borra erabiliz; borra hitzak dituen lehen hiru esanahiak erabiliz: https://t.co/EU0lXOdihL?amp=1

(*) Testu hau Jakin aldizkariaren 236. alerako idatzitako artikuluan oinarrituta dago. Artikulu osoa hemen irakur daiteke: https://www.jakin.eus/blog/soziolinguistika/jaime-altuna-ramirez/erdigune-eta-ertzetako-zizelkariak/352

Kronikaren egilea: Jaime Altuna, Blagankidea

Egunean behin: Blagan taldeko martxoko eta denboraldiko irabazleak

Dagoeneko amaitu da Egunean Behin jokoaren denboraldi berria, eta sari bikoitzarekin gatoz: martxoko azken asteko irabazlearena eta denboraldi osoarena.

Martxoko azken asteko irabazlea “Olatz” izan da 543.50 punturekin.
Eta denboraldiko irabazlea “Iñigo” izan da 2119.44 punturekin. Zorionak bioi!!!

Hauek dira sariak:

  • Martxoko saria: Oihana Etxebarrieta eta Maria Ruizen “Argi-izpiak txarrantxen artean” liburua
  • denboraldiko saria: Iñaki Sanz-Azkuek eta Ainara Azpiazu “Axpi”-k elkarlanean egindako “Basoko begiak” liburua

Bi liburu hauen aurkezpenak gure kultur jardueretan programaturik genituen martxorako eta apirilerako, baina atzeratu behar izan ditugu eta oraingoz ez dugu datarik zehaztuta.

Hauekin batera, ale bana ere zozkatu dugu parte-hartzaile guztien artean. Kasu honetan, “Egoitz” izan da martxoko zozketan saritua, eta “Anezufi” izeneko jokalaria izan da denboraldiko saria jasoko duena. Zorionak bioi ere!!

Saria jasotzeko jarri arremanetan gurekin euskarazblagan@gmail.com helbidearen bitartez. Egoerak baimendu ahala ekingo diogu sari banaketari.

Mila esker eta zaindu zaitezte!!

Galdera_erantzunen_jokoa

 

Euskarazko baliabideen zerrenda UEMAren eskutik #EtxeanGoxo

Kaixo Blagankide eta Blaganzale! Hau luzerako doa eta irauten duen bitartean, badago zer eginik. Esate baterako, UEMAk (Udalerri Euskaldunen Mankomunitateak) Etxean goxo egoteko euskarazko baliabideen zerrenda argitaratu du. Covid-19 birusak eragindako ezohiko egoera dela eta, etxealdiak irauten duen bitartean kontsultatu ditzakegun baliabideak dira, ikasteko, jolasteko, informatzeko…. Guztiak ere doan eta euskaraz. Sartu eta disfrutatu euskaraz!

Errigora eskariak Bordariko idazkaritzan egiteko aukera!

ErrigoraJPG

Nafarroa hegoaldeko oliba-olio birjina estra, arroza, pasta eta kontserbak eskatzeko azken egunak  hurbiltzen ari dira. Ez ezazu galdu aukera bertako eta kalitate bikaineko produktuak ekoizlearen jatorrizko prezioan eta euskaraz etiketatuta eskuratzeko.

Bi aukera:

On-line INFORMAZIOA ETA ESKAERAK (epea Martxoak 12)

Bordariko idazkaritzan eskaera egin eta bertan jaso (epea Martxoak 15)

 

 

Bertso Zaharrak emanaldia Apirilak 3an – BERTAN BEHERA!

OHARRA: Emanaldia bertan behera gelditu da. Egoera normalizatzean berriz ere antolatzen saiatuko gera.
—————————————-
Blaganek bertso tailerrarekin batera BERTSO ZAHARRAK emanaldia antolatu du Apirilaren 3rako, ostirala,  Hondarribiko Olagarro Kultur Elkartean. 20:30etatik aurrera izango da eta prezioa 20€an (afaria + barrikotea).
Guztira 70 lagunentzako tokia izango da eta Blaganeko kideontzat 20 leku gordeta daude. Lehendabizi apuntatutakoak izango dute lehentasuna, beraz lehen bai lehen hasi izen ematen.
Izen emateko Xabier Isasiri idatzi whatsapa (629482433) edo mezu elektronikoa( xabisasi@gmail.com ) .
Ordainketa,  afari egunean,  Olagarron bertan egingo da.
Animatu!

Egunean behin: Blagan taldeko otsaileko irabazleak

Egunean behineko denboraldi berriarekin batera Blaganeko taldea sortu genuen,  eta orduan esan bezala: hilabete bakoitzeko azken asteko irabazleak izango du saria.
Otsaila joan da eta hileko azken asteko irabazlea belagile izan da, 528.97 punturekin. Zorionak!!!
Hil honetako saria otsailaren 12an gurekin egon ziren Yurre Ugarte eta Joseba Larratxeren “Joana Maiz” komikiaren ale bat da, egileek sinatuta!
Horrekin batera, beste ale bat ere zozkatu dugu parte-hartzaile guztien artean. Kasu honetan, Hondarraitzu izeneko jokalaria izan da irabazlea. Zorionak bioi!!

Saria jasotzeko jarri arremanetan gurekin euskarazblagan@gmail.com helbidearen bitartez.

Galdera_erantzunen_jokoa

Blaganek Egunean Behin galdera erantzunen euskarazko jokoan taldea osatu du. Eman izena eta jolastu gurekin!

Galdera_erantzunen_jokoa

Blagan Hondarribiko euskara elkarteak Egunean Behin jokoko taldea osatu du. Astelehenean, otsailak 3, hasiko da denboraldi berria, eta martxoaren 29ra arte izango da martxan. Hileko azken asteko puntuazio onena eskuratzen duen partaideak saria irabaziko du.

Jolasteko: Egunean Behin aplikazioa Google Play edo App Store plataformetatik deskargatu behar da. Aplikazioaren behealdean kokatzen den Taldeak atalean, (+) ikurra zapaldu, giltzari klikatu eta 7D9390 kodea sartu behar da, Blagan, Hondarribiko euskara elkartea izeneko taldera batzea lortuko du erabiltzaileak orduan.

Animatu parte hartzera! Egunean behin partida bakarra jokatzeko aukera izango duzu. 10 galdera erantzun beharko dituzu, ahalik eta azkarren. Zenbat eta gehiago asmatu, zenbat eta azkarrago asmatu, hobeto!

Blagan Batzar Nagusia: Urtarrilak 25, 2020

Larunbatean, urtarrilaren 25ean goizeko 10etan Gaztetxean, Blaganen Batzar Nagusia izango dugu. 

NonGaztetxean ,Juan Laborda kalea 3.

Noiz: Urtarrila 25ean, 10:00 – 13:00

Gai zerrenda:

– Aurreko aktaren onarpena

– Blaganen antolaketa eta funtzionamendua

– 2020rako proiektu, ekintzak eta aurrekontuak

– Euskaraldia; Blaganen parte hartzea

– Norberak lekarkeena

Batzar Nagusiak garrantzitsuak dira elkar hobeto ezagutzeko, Blaganen etorkizuna denon artean marrazteko, saretzeko… eta nola ez, kide berriak gerturatzeko. Balia dezagun aukera, bai bertaratuz eta baita ingurukoak animatuz.